Жаңалықтар

Базарбай Бурабаевқа сапар

Жеңіс күні – Қазақстан халқы үшін айтулы мереке. Екінші дүниежүзілік соғыс кезінде миллиондаған қазақстандық неміс фашизміне қарсы күресте жан алысып, жан беріскеніне тарих куә. Ұлы Отан соғысы ардагерлерінің сол жылдардағы ерен еңбегі – бүгінгі ұрпақтың мәңгілік есінде. Осыған орай, Қазақстан Республикасы Мәдениет және спорт министрлігінің Мәдениет комитетіне қарасты «Ежелгі Тараз ескерткіштері» мемлекеттік тарихи-мәдени музей-қорығының қызметкерлері Ұлы Отан соғысының ардагері 98 жастағы Базарбай Бурбаевтың шаңырағында болып, қарияны Ұлы Жеңіс күнімен құттықтап, ақ батасын алып қайтты.

Базарбай Бурбаев 1924 жылы 10 желтоқсанда Жамбыл қаласында дүниеге келген. Каганович атындағы мектепте оқыған. 1942 жылы әскерге шақыртылған. 393-атқыштар полкінде минометші болған. Манчжурия, Мугден, Харбин тағы басқа қалаларды азат етуге қатысқан. Ерлігі мен қайсарлығы үшін «Қызыл жұлдыз» орденімен, «Жапонияны жеңгені үшін» медальдарымен марапатталған. Манжуриядан 1947 жылы елге оралған. 1949 жылдан 1988 жылға дейін Жамбыл локомотив депосында машинист болып қызмет атқарған. Сонымен қатар «Еңбек ардагері» медалімен марапатталған.

Бұл мереке – жанқияр ерліктің, еңселі елдіктің рухы өрлеп, жеңіс жалауы желбіреген күн. Бүгінгі тәуелсіздік тұғырының берік, еңсеміздің биік болуы да, еліміздің өркендеуі де – осынау мерекенің жемісі. Бүгінгі ұрпақ ардагерлер танытқан қаһармандық пен қайсарлықтан үлгі алып, бой түзейді. Осынау ерлікке толы күн тарихымыздың мәңгілік ұмытылмас парағы болып қала бермек.

Құрметті Ұлы Отан соғысының ардагерлері, ауыр күндердегі адал еңбектеріңіз бен белсенді азаматтық ұстанымдарыңыз үшін бас иіп алғыс білдіреміз! Сіздерге мықты денсаулық, бақыт, ұзақ ғұмыр тілейміз!

09 Мамыр 2023 view

209

«Тараз – өткеннің куәсі, қазіргінің өнегесі» жылжымалы көрме

Қазақстан Республикасы Мәдениет және спорт министрлігінің Мәдениет комитетіне қарасты «Ежелгі Тараз ескерткіштері» мемлекеттік тарихи-мәдени музей-қорығының қызметкерлері 7 мамыр – Отан қорғаушылар күні мерекесіне орай Қазақстан Республикасы Ішкі Істер Министрлігі Көліктегі Полиция Департаментінің Тараз станциясындағы желілік полиция бөлімінің қызметкерлеріне «Тараз – өткеннің куәсі, қазіргінің өнегесі» тақырыбында жылжымалы көрме ұйымдастырып, танымдық дәріс оқыды.

Ең алдымен тарихшы Мадина Мананбайқызы көне дәуірлердің естелігі, үлкен руханият орталығы болған, екі мың жылдан астам тарихы бар Тараз шаһарының тарихына тоқталып өтті. Содан соң ғылыми қызметкер Ұлжалғас Шаизханқызы музей-қорығына қарасты Республикалық маңызы бар 30 тарихи-мәдени ескерткіштерінің қайталанбас тарихымен, кесенелерге қатысты әртүрлі аңыз, әңгімелермен таныстырды.

Мекеме тарихшысы Гүлмарал Үшкемпірқызы 2011–2017 жылдар аралығында мекемеге қарасты нысанның бірі – «Көне Тараз» аспан асты саябағында жүргізілген археологиялық жұмыстар кезінде табылған қала орны мен құнды әрі бірегей жәдігерлердің тарихын баяндады. Атап айтсақ, әр кезеңге жататын мәдени қабаттан табылаған қыш бұйымдары мен металдан жасалған бұйымдардың мерзімін, жасалу техникасы мен пайдалану мақсаттарын түсіндірді.

ҚР ІІМ Полиция департаментінің қызметкерлері танымдық дәрісті үлкен қызығушылықпен тыңдап, көптеген сұрақтар қойып, көрмеден алған әсерлерін таңданыспен жеткізді. Іс-шара соңында департамент басшысы полиция полковнигі Қ. Орынбеков мырза ұжым қызметкерлеріне өз алғысын білдіріп, алғыс хатпен марапаттады.

05 Мамыр 2023 view

161

Мадина Мананбайқызының сұхбаты

Қазақстан Республикасы Мәдениет және спорт министрлігінің Мәдениет комитетіне қарасты «Ежелгі Тараз ескерткіштері» мемлекеттік тарихи-мәдени музей-қорығының тарихшысы Мадина Мананбайқызы «Жамбыл» радиосы «Асыл қазына» бағдарламасына тарих, археология саласына байланысты сұхбат берді. Сұхбат барысында археология ғылымдарының шығу тарихы, Қазақстанды зерттеген орыс археологтары, Қазақстанда археология ғылымының дамуы туралы айтылды. Бағдарлама әр дүйсенбі сайын FM 100,8 әуе толқына шығады.

02 Мамыр 2023 view

161

«Тараз – Жібек жолының інжу-маржаны»

М. Х. Дулати атындағы Тараз өңірлік университетінің «Туризм және сервис» кафедрасының «Сервис» студенттік ғылыми үйірмесі ұйымдастырып отырған «Тараз – Жібек жолының інжу-маржаны» тақырыбында көшпелі ашық отырыс (семинар-конкурс) өткізілді. Семинар аясында студенттерге Қазақстан Республикасының Мәдениет және спорт министрлігі Мәдениет комитетінің «Ежелгі Тараз Ескерткіштері» мемлекеттік тарихи-мәдени музей-қорығына қарасты «Көне Тараз» археологиялық ашық аспан астындағы саябағында қазба жұмыстары барысында табылған музейдің құнды әрі бірегей жәдігерлерінен жылжымалы көрме жасақталып, экскурсия жүргізілді. Экскурсия барысында студенттер өз қызығушылықтарын білдіріп, көптеген сұрақтар қойып, жауабын ала алды. Жылжымалы көрменің жасақталуы – ата-бабамыздан мирас болып қалған сан ғасырлық тарихты өскелең ұрпаққа насихаттап, дәріптеу болып табылады.

28 Сәуір 2023 view

714

«Zhambyl Investment and Economic Forum – 2023» басталуы

Ағымдағы жылдың 26–27 сәуір күндері Жамбыл облысы әкімдігінің ұйымдастыруымен «Zhambyl Investment and Economic Forum – 2023» халықаралық экономикалық және инвестициялық форумы өтті. Ауқымды іс-шара туризм, өнеркәсіп, цифрландыру және ауыл шаруашылығы сияқты экономиканың түрлі салалары мен секторларында инвестициялық мүмкіндіктерді ілгерілету мақсатына негізделді. «ZHEIF – 2023» форумына жетекші халықаралық компаниялар мен отандық бизнестің 700-ден астам өкілі, инвесторлар, сарапшылар мен пікір көшбасшылары, сондай-ақ, салалық министрліктердің өкілдері мен түрлі компаниялардың басшылары қатысты.

Форум аясында 26 сәуір күні қатысушыларға Жамбыл облысы әкімдігі туризм басқармасы мен Қазақстан Республикасы Мәдениет және спорт министрлігінің Мәдениет комитетіне қарасты «Ежелгі Тараз ескерткіштері» мемлекеттік тарихи-мәдени музей-қорығы бірлесіп, Қарахан, Дәуітбек, Айша бибі, Бабаджа хатун, Ақыртас нысандарына және «Көне Тараз» археологиялық саябағына ақпараттық тур ұйымдастырды. Экскурсия барысында форум қатысушылары музей-қорық қызметкерлеріне алғыстарын білдіріп, алған әсерлерін таңданыспен жеткізді.

Жамбыл облысының туристік әлеуетін өсіру мен музей-қорыққа тиесілі нысандарды насихаттау, әрі туристік тартымдылығын арттыру мақсатында 27 сәуір күні «Leyli Travel» ЖК, «Тараз-Профсоюз-Турист» ЖШС, «Золотой караван» ЖШС, «Каралма» ЖШС, «EverestTime» туристік компанияларымен ынтымақтастық туралы меморандумға қол қойылды. «ZHEIF – 2023» форумы «Ежелгі Тараз ескерткіштері» мемлекеттік тарихи-мәдени музей-қорығы үшін тиімді, әрі нәтижелі аяқталды.

27 Сәуір 2023 view

725