Қазақстан Республикасының Мәдениет және спорт министірлігіне қарасты «Ежелгі Тараз ескерткіштері» мемлекеттік тарихи-мәдени музей-қорығының қызметкерлері №2 орта мектебінде "Ежелгі шеберлер мұрасы" тақырыбында жылжымалы көрме өткізді. Көрме барысында оқушыларға музей-қорығына қарасты 30 нысан туралы бейнематериалдар көрсетілді. Сондай-ақ оқушылар назарына археологиялық қазба жұмыстары нәтижесінде Тараз қалашығынан табылған құнды жәдігерлер ұсынылды. Атап айтсақ, әр кезеңде басылған тиындар, мөр-таңбалар, көптеген құнды тарихи жәдігерлер: қазандар, табақтар, құмандар, шырақ сынықтары, құмыралар, тегенелер, қол диірмендері сияқты заттардың тарихымен танысты. Құнды жәдігерлерді ұрпақтан-ұрпаққа жеткізіп, насихаттау және дәріптеу жұмыстарын жүргізу басты мақсат болып табылады. Мектеп ұстаздары мен оқушылары жылжымалы көрмеден алған әсерлерін таңданыспен жеткізе отырып, музей ұжымына алғыс білдірді.